బీరపొట్టుతో బండ పచ్చడీ - "పెసర కట్టు" అనబడే ఓ రకం చారూ....
హమ్మయ్య! మొన్న వండిన కూరలకి, రాయటానికి ఇవ్వాళ్టికి తీరిక దొరికింది......ఇవ్వాళా, రేపు మరో రెండు వెరైటీలు.....అవెప్పుడు రాయాలో!!!...స్వయంపాకం ఏమోగాని నా చెయ్యి అద్భుతంగా తిరుగుతోంది....అసలు ఒక్కో కూరా ఎలా కుదుర్తున్నాయంటే మాటల్లో చెప్పలేనన్నమాట! అన్నీ చేత్తో, అమ్మవాళ్ళలాగానే ఉరామరిగ్గా వేసేస్తున్నా..ఒక్ఖటి కూడా మొరాయించకుండా చక్కగా ఒదిగిపోతున్నయ్..:).ఇవ్వాళ నిమ్మకాయ పులిహోర కలిపానా..నా జీవితంలో మొదటిసారి పులిహోర చెయ్యడం..అచ్చు అమ్మ పులిహోరలానే కమ్మగా ఉంది.{అమ్మ రకరకాల పులిహోరలు చెయ్యటంలో దిట్టలెండి,మా ఊర్లో అంతా ఫేమస్సు, ఎవరింటో బంతి పెట్టుకున్నా,పులిహోర కలపడానికి అమ్మనే పిలుస్తారు...}.....వెరైటీ ప్రియత్వం ఎక్కువైన నా నాలిక్కి పెద్ద పండగలా ఉంది......
కాని వంట చేతవ్వడం పెద్ద గొప్పకాదనిపిస్తోంది, ఓపిగ్గా రోజూ నలుగురైదుగురికి రెండు మూడు రుచులు వండిపెట్టాలంటే మాత్రం చాలా గొప్పపని, బహుకష్టం.....ఎంత ప్లానింగు ఉండాలో,ప్రతి రోజూ ఎన్ని ప్రణాళికలు గీయాలో!!!.....ఆడవాళ్ళూ మీకు సలాం, అందుకు మాత్రం..{కాని రుచిగా మేం వండినట్టు మీరు వండలేరులే....;)...}....
మరీ "స్వడబ్బా" కాస్త ఎక్కువైనట్టుంది కదా! మరి నే చేసిన వంట మన బ్లాగర్లెవరన్నా తినుంటే కాస్త నాగురించి "పరడబ్బా" వాయించేవాళ్ళు....తర్వాత కామెంట్లలో "పరస్పర డబ్బా" ఎటూ ఉండేదే అనుకోండీ...;)......"అబ్బ! నీ సోది ఆపి మ్యాటర్ కి వచ్చెయ్ రా బాబూ" అనుకుంటున్నారా...వాకే వాకే....ఇవ్వాళ పాకవేదంలో ఏం నేర్చుకోబోతున్నారో మీరు టైటిల్ చూస్తే అర్థం అయ్యి ఉండాలి......అసలు ఈ "బీరపొట్టు పచ్చడి" కి పేద్ద హిస్టరీ ఉందిలెండి..అది తర్వాత తీరిగ్గా ఉన్నప్పుడెప్పుడన్నా చెప్పుకుందాం.....కొంతమంది పీక్కుతినే బ్యాచ్ ఉంటారు, వాళ్ళు అంటుంటారు,"బీరపొట్టు పచ్చడా! ఏం బీరకాయల్తో చేస్తారుగా,చాల్లేదా...పొట్టుకూడా వదిలిపెట్టరా!" అని....వాళ్ళ బొంద వాళ్ళకేం తెలుస్తది, ఒక్కసారి తింటే ఎవడూ వదిలెపెట్టలేరని తెలిసి చస్తేగా.....అసలు ఇలా ఏ పదార్థాన్నీ వ్యర్థం అనుకోకుండా ప్రతి దాంటో ఉన్న రుచిని వెతికి పట్టుకునే తత్వం మన తెలుగోళ్ళకి తప్ప ఇంకెవరికీ ఉండదేమో......
ఇక పచ్చడి ఎలా చెయ్యాలో చెప్తా, పన్లో పనిగా బీరకాయ కూర కూడా చెప్పేస్తానేం సింపుల్గా........
- ముందు బాగా లేతగా పీచు పట్టకుండా ఉన్న బీరకాయలు తీసుకోండి...అదెలా తెలుస్తుందంటారా..విరిచి చూస్తే చక్కగా విరిగిపోతుంది,మొరాయించకుండా....కొంచెం మొరాయించినా పీచు పట్టేసినట్టే.....కాయల్ని బాగా కడగాలి....కడిగాక మొదలు,చివర్లు కోసేసి ఎత్తుగా ఉన్న రిడ్జెస్ ని ముందు స్క్రాపర్ తో గీకెయ్యండి.ఎందుకంటే అది పడితే పచ్చడి మరీ గరుగ్గా తగిలిద్ది తినేప్పుడు.......తర్వాత చెక్కు మొత్తం తీసెయ్యండి...ఇలా అన్ని కాయల చెక్కు తీశాక దాన్ని వేరేగా తీసి, బాగా కడగండి.....చెక్కు తీసిన కాయల్ని కూడా బాగా కడిగి మోయనమైన సైజుల్లో ముక్కలు కోసుకోండి, తర్వాత కూర చేసుకుందాం.....:)
- ఇక ఈ చెక్కుని బాండీలో తీసుకుని, కాసిన్ని పచ్చి మిరగాయలు,ధనియాలు,జీలకఱ్ఱ వేసి ఒక చిన్నగెంటెడు నూనె వేసి,పొయ్యి మీద పెట్టి బాగా వాడ్చండి.....పచ్చి మిరగాయలు కోసి వేయించొద్దు,కోరొచ్చిద్ది.....పచ్చిమిరగాయల మీద తెల్లగా మచ్చలు వచ్చే వరకు వేయించండి....(అరకేజీ బీరకాయల పొట్టుకు నాలుగైదు మిరగాయలు సరిపోతై.తినేవాళ్ళు ఉల్లిపాయలు కూడా వేసుకుని వేయించుకోవచ్చు.కాని ఉల్లిపాయలు వేస్తే పచ్చడి నిలవుండదు.వెయ్యకపోతే ఫ్రిజ్జులో పెట్టకపోయినా నాలుగురోజులుంటుంది)..
- ఇప్పుడు పైన వేయించినవన్నీ రోట్టో వేసి తొక్కుకోవాలి...తొక్కేప్పుడు రెండు వెల్లుల్లి రెబ్బలూ,కాస్త చింతపండూ,సరిపడా ఉప్పూ,కాస్త కొతిమీరా వేసి కచ్చాపచ్చాగా తొక్కుకోవాలి.రోలు లేకపోతే మిక్సీలో ఒక తిప్పు తిప్పి వదిలెయ్యండి.....మరీ మెత్తగా గ్రైండ్ చేస్తే రుచి అంతగా ఉండకపోగా గరుగ్గా తగుల్తూ ఉంటుంది.....ఇలా తొక్కుకున్న పచ్చడిని అలానే తినెయ్యొచ్చు.లేకపోతే కొంచెం నూనె వేసి ఇంగువ తిరగమాత పెడితే బాగా రుచొస్తుంది,నిలవుంటుంది.
ఇక బీరకాయ కూర కూడా సింపుల్గా చెప్పేస్తానేం.....
- పైన చక్కగా ముక్కలు తరిగిపెట్టుకున్నారు కదా, వాటికి తోడు రెండు లేత ములక్కాయల్ని కూడా చిన్న ముక్కలుగా కోసి పెట్టుకోండి.బీరకాయకి ములక్కాయ కాంబినేషన్ అదిరిపోతుంది.తినాలనుకునేవాళ్ళు ఉల్లిపాయలు కూడా వేసుకోవచ్చు...
- తర్వాత పొయ్యి మీద కూరగిన్నె పెట్టి దాంట్లో తాలింపు పెట్టండి....ఆ తాలింపులో ముక్కల్ని వెయ్యండి.తర్వాత ఉప్పూ,కారం వేసి కాసిన్ని నీళ్ళు పోసి మూత పెట్టి ఉడకనివ్వండి.(స్టీలు గిన్నెగాని,కాపర్ బాటమ్ గిన్నె కాని ఐతే సిమ్ లో ఉడికించండి. లేకపోతే నీళ్ళున్నా బీరకాయ కూర ఊరకనే మాడిపోద్ది). కారం సంబారుకారమైతే బాగా రుచొస్తుంది....
- ఇక ముక్క బాగా ఉడికి, నీళ్ళన్నీ ఇగిరిపోతున్నాయనుకోగానే ఒక 100ml కాచిన పాలు పోసి ఒక్క నిమిషం మగ్గనిచ్చి దించెయ్యండి...బీరకాయకి పాలు వేస్తేనే రుచి...ఎన్ని పోస్తే అంత గుజ్జుగా,కమ్మగా ఉంటుంది కూర.....
ఇక మన టైటిల్లో రెండో వంటకం "పెసరకట్టు " చూద్దాం..... మా ఇళ్ళల్లో ఐతే పెసరపప్పు దోశలకి,వడపప్పుకి మహా ఐతే పునుగులకి తప్ప ఇక దేనికీ వాడరు..పప్పుగాని,పప్పుచారు గాని అస్సలు చెయ్యరు....తృష్ణగారి బ్లాగులో చూశాక నాకు చేద్దామనిపించి చేశా,ఆద్భుతంగా కుదిరింది....నెట్ లో కొన్ని వీడియోలు,రెసిపీలు చూశా..ఒక్కోళ్ళు ఒక్కోలా చెప్తున్నారు...అన్నిట్నీ క్రోడీకరించి చూద్దునా ఇదో రకం పప్పుచారే, ఐతే కాస్త పల్చగా పెడతారు....మరి దీన్ని "కట్టు" అని ఎందుకంటారూ! అని నన్నడగొద్దు, అది నాకు ఇప్పటికీ అర్థం కాలా...:)...ఇక నేనెలా పెట్టానో ఈ పెసరకట్టు చెప్తా...
- ముందు పెసరపప్పుని మరికాసిన్ని నీళ్ళుపోసి ఉడికించాలి...(ఒకటికి మూడు పోశాన్నేను)....కుక్కర్ మూడు విజిల్స్ రాగానే దించి పప్పుని బాగా పప్పుగుత్తితో మెత్తగా ఎనిపాను....
- ఈ పప్పుని వేరే గిన్నెలో తీసుకుని ఎక్కువనీళ్ళు(అరగ్లాసు పప్పుకి అరలీటరు పైన) పోసి, దాంటో పచ్చిమిరగాయలు రెండు(నిలువుగా చీల్చి), ఒక టమాటా ముక్కలు చేసి వేశా...ఇక బాగా మరిగించడమే....మరిగేప్పుడు సరిపడా ఉప్పు కాస్త అల్లం,వెల్లుల్లి,కొతిమీర వేశా......రెండు మిరియాలు,రెండు ధనియాలు వేయించి పొడి కొట్టి వేశా.....ఓ చిటికెడు పసుపు కూడా వేసి కొంచెం చిక్క బడే వరకూ మరిగించా...దించి మాంచి ఇంగువపోపు పెట్టి ఈ చారులోకి తిప్పెయ్యడమే.....చారు కొంచెం వేడి తగ్గాక కాస్తంత నిమ్మరసం పిండాను....అంతే "పెసరకట్టు" అనబడే పప్పుచారు రెడీ.... ;)
కాని నాకు నిమ్మరసం వెయ్యకముందే బాగా అనిపించింది...చక్కగా వేడి వేడిగా సూపులా తాగెయ్యొచ్చనిపించింది....ఇది అన్నంలో కలుపుకున్నా చాలా బాగుంది. రియల్లీ ఫింగర్ లికింగ్ టేస్ట్.....కొంతమంది చింతపండు పులుసు వేసి చేస్తారట, అప్పుడిక "కట్టు" అనటమెందుకూ, పప్పుచారు అనేస్కోవచ్చు...:)....ఈ మాట ఆ యాంకరమ్మ అడిగితే ఆవిడ తెలివిగా చెప్పిన సమాధానం, దీంటో ఉల్లిపాయలు వెయ్యంకదా అని....హ్హిహిహిహ్హి....మరప్పుడు ఉల్లిపాయలు తినని మాలాంటి వాళ్ళు పెట్టుకున్నే పప్పుచార్లన్నిటినీ "కట్టు"లు కట్టెయ్యాల్సిందేనా.....:)
దోసకాయ ఇగురూ - మిరియాల చారూ
అమ్మ వచ్చి నాల్రోజులుండెళ్ళింది....,చక్కగా వండిపెట్టింది నాకిష్టమైన కూరలన్నీ.. అందులోనూ పులుసులు, నా ఆల్‍టైమ్ ఫ్యావరేట్స్....ఇక అమ్మ వెళ్ళిన దగ్గర్నుంచీ నాలుక మెస్సుకెళ్ళనని మొరాయించింది..ఇక తప్పదు కదా నాలుకవాడు ఎల్లా చెప్తే అల్లా వినాలి మరి...అయినా ఆ మెస్సు వెధవలు ఏనాడూ ఒక్ఖ పులుసుకూర కూడా చెయ్యరాయె...ఎప్పుడు చూడు పప్పు,వేపుడు కూరలు ఇంతింత పిచ్చిత్తుల నూనెలు పోసి, ఆఖరుకి తోటకూర ఎప్పుడన్నా చేసి తగలడితే అది కూడా రుచీపచీ లేకుండా వేయించి పడెయ్యడమే,ఇక అన్నంలో ఏం కలుపుకు చస్తాం..:).....కావున మన నాలుకవాడు కోరిన విధంగా ఇక నుంచి స్వయంపాకమే బెస్టనిపించి నిన్నట్నుంచి రంగంలోకి దిగిపోయా..అమ్మ వచ్చేప్పుడు కమ్మగా ఓ చిన్నడబ్బాడు "సంబారుకారం" కూడా తెచ్చింది,ఇక మనకి తిరుగేముంది, జంకూ గొంకూ లేకుండా ముందుకు దూసుకెళ్ళడమే...:)....
పైగా నిన్న ఒక అజ్ఞాతగారు స్టార్టింగ్ కిట్ కావాలన్నారు...కాబట్టి మనం మామూలుగా వండే కూరలు కూడా రాసేస్తే పోలా అనిపించింది, దానికి రావుగారి ప్రోత్సాహం కూడా......అసలు నా బ్లాగు మొదలెట్టిందే అందుకనుకోండి, కాని మరీ మామూలుగా వండుకున్నే కూరలు వీడు చెప్పేదేంటి అనుకుంటారని,దానికితోడు ఆ మధ్య జరిగిన చిన్న రగడవల్ల ఆ రకాలు కాస్త పక్కకి పెట్టా....కాని అవి కావల్సినవాళ్ళు చాలా మందే ఉన్నారనిపిస్తోంది, అందుకే రాసేస్తున్నా...:)..
ఇక నిన్న నా కంచంలోకి చేరినవి నాలుగు రకాలు....రెండు కుండపచ్చళ్ళు, ఒకటి ఉసిరికాయ నల్ల పచ్చడి, రెండోది మొన్న అమ్మ వస్తూ చేసుకొచ్చిన టమాటా ఎండుమిరగాయల పచ్చడి........తర్వాత అక్కడ అందంగా కనబడుతోంది దోసకాయ ఇగురు, నా పిచ్చ ఫ్యావరేట్.....తర్వాత మిరియాలచారు...ఆ తర్వాత మాంఛి పెరుగు..అదీ నా నిన్నటి భోజనం......ఇప్పుడు మీకు దోసకాయ ఇగురూ, మిరియాల చారూ ఎలా వండేనో చెప్పబోతున్నానన్నమాట......నిజ్జంగా నిజం చెప్పాలంటే నాకు పిండివంటలూ,స్పెషల్ ఐటమ్సూ కుదిరినంత బాగా మామూలు కూరలు కుదరవు.....కాని నిన్న ఈ రెండూ అద్భుతంగా కుదిరాయ్,అచ్చు అమ్మ వండినవాటిలా.....నేను తింటుంటే మా ఫ్రెండొకడు వచ్చి ముద్దలు పెట్టించుకుని "కెవ్వు"మనేశాడు.....:)......అద్దన్నమాట సంగతి!...:)
మొదట దోసకాయ ఇగురెల్లా చెయ్యాలో చెప్తా.......
కొన్ని జీవాలుంటాయ్, దోసకాయంటే ఆమడదూరం పరిగెడతారు...అడిగితే మాకు దాని వాసన పడదు(చేపల కంపు మాత్రం హాయిగా పీల్చుకుంటారు..:)...) అంటారు....సరిగ్గా వండిన దోసకాయ ఎప్పుడూ తిని ఉండరు..వాళ్ళ దురదృష్టానికి నాకు జాలేస్తుంటుంది......నాకు తెలిసి దోసకాయంత ప్రియంగా,హాయిగా గొంతు దిగే కూర మరోటి ఉండదేమో...అందునా ఈ ఎండాకాలంలో దోసకాయకూర లోపలికెళ్తుంటే ప్రాణానికి ఎంతహాయిగా ఉంటదో....అసలు దోసకాయ ఎన్ని రకాలుగా వండుకోవచ్చో...పప్పులో పెట్టుకోవచ్చు,పులుసు పెట్టుకోవచ్చు,పాలేసి ఇగురొండుకోవచ్చు, పచ్చి ముక్కల పచ్చడి రకరకాలుగా తొక్కుకోవచ్చు,ఒరుగులు పెట్టుకోవచ్చు....ఏంటో! పాపం ఆ జనాలు ఇన్ని రుచులూ మిస్సయినట్టేకదా...:).....సర్లెండి మనం నేర్చుకుందాం,వండుకుందాం,తిని ఎంజాయ్ చేద్దాం....:)
- మొదట మంచి కండ పట్టి ఉన్న దోసకాయలు తీసుకోండి, అరకేజీ నలుగురికి సుష్టుగా సరిపోతుంది......కాయ మరీ పండి మగ్గితే ఇగురుకి పనికిరాదు, పులుసు పెట్టుకోవాల్సిందే....కాబట్టి మరీ పచ్చి,పండు కాకుండా దోరగా,గట్టిగా,నిగనిగలాడే పసుపు రంగులో ఉన్న కాయలైతే బాగుంటాయ్......ఇప్పుడు ఈ కాయల్ని శుభ్రంగా కడిగేసి,చెక్కు తియ్యండి.....ప్రతి కాయనీ సగానికి కోసి మధ్యలో విత్తనాలున్న గుజ్జుని కాస్త నోట్టో వేసుకు చూడండి,చేదుగా ఉంటే విత్తనాలు తీసి పడెయ్యండి.అప్పుడు కండ కూడా కాస్త గిల్లితిని చూడాలి,అదీ చేదుగా ఉంటే పడెయ్యటమే....:).....{కొంత మంది విత్తనాలు వేసుకోడానికి ఇష్టపడరు...కాని ఇగురు కూరలో విత్తనాలు తగుల్తుంటే చాలా రుచిగాఉంటుంది....ఒకవేళ విత్తనాలు తీసేసేట్టైతే వాటిని పడెయ్యకుండా ఎండబెట్టుకుని, చింతకాయపచ్చడి తొక్కేప్పుడు వేయించి కలిపి తొక్కితే పచ్చడి ఘుమఘుమలాడిపోద్ది......}..ఇక కాయల్ని సన్నగా సమానమైన సైజుల్లో ముక్కలుకొయ్యాలి...ఎక్కువాతక్కువగా కోస్తే కూర సరిగ్గా ఉడకదు.....నేనైతే పైన ఫొటోలో ఉన్నట్టుగా మోయనమైన సైజులో కోస్తాను,అప్పుడు ముక్క పంటికింద తగుల్తూ బాగుంటుంది....మా అక్కవాళ్ళు సన్నగా తరిగేస్తారు,అప్పుడు కూర గుజ్జుగా ఐపోద్ది..అదోరుచి...:)
- తర్వాత కావాలంటే ఒక టమాటా, రెండు పచ్చిమిరపకాయలు,కాసిన్ని ఉల్లిపాయలు తరిగివేసుకోవచ్చు...నేను ఉల్లిపాయలు వాడను..దోసకాయలో ఉన్న సాధుత్వం పోతుంది.....ఇలా తరిగి పెట్టుకున్న ముక్కలన్నీ ఒక పక్కన పెట్టుకోండి...
- ఇప్పుడు పొయ్యి మీద గిన్నె పెట్టి దాంటో ఓ చిన్నగెంటెడు నూనేస్కోవాలి...అది కొంచెంకాగిందనగానే ఒక ఎండు మిరగాయ తుంచి వెయ్యండి...తర్వాత ఆవాలు,తాలింపుగింజలూ(మినప్పప్పూ,పచ్చనగపప్పూ),కాస్త జీలకఱ్ఱా,కొంచెం ఇంగువ,కాస్త కరివేపాకు వేసుకోవాలి...ఇవన్నీ వేగి చిటపటలాడాయనుకోగానే,పైన కోసి పెట్టుకున్న ముక్కలన్నీ ఆ తాలింపులో వేసెయ్యండి.....తాలింపు వేగినంత సేపూ పొయ్యి సిమ్ లోనే ఉంచుకోండి..తాలింపు మాడకుండా ఉండటానికి ఇది సేఫ్టీ మెజర్...:)
- ఇప్పుడు ఓ గ్లాసెడు నీళ్ళు పోసి, మూత పెట్టి ఒక రెండు నిమిషాలు మగ్గనివ్వండి....తర్వాత మూత తీసి సరిపడా ఉప్పూ,కారం వేసుకోవాలి....ఎంత వెయ్యాలీ? అంటే నేను ఖచ్చితంగా కొలతలు చెప్పలేను..నేను చేత్తో తీసుకుని ఉరామరిగ్గా వేసేస్తా...:)..మీరు వేసుకు సరి చూసుకుని మళ్ళా కలుపుకోండి....కాని దోసకాయకి కొంచెం ఎక్కువే పడతాయ్ ఉప్పూ,కారాలు....మా సంబారుకారమేశారనుకోండి, అది వెయ్యగానే కూర ఉడుకుతుంటే వచ్చే వాసనకే మీకు పొట్టనిండిపోద్ది మరి...:)
- ఇక మూతపెట్టి ఉడకనివ్వండి...మధ్య,మధ్యలో మూత తీసి చూసి కలపెడుతూ ఉండాలి,లేకపోతే అడుగు మాడిపోద్ది...ముక్క ఉడక్కుండానే అడుగు మాడుతుందని అనుమానమొస్తే ఇంకాసిని నీళ్ళు పోసి ఉడికించండి....ఎగరెయ్యటం చేతైతే ఎగరెయ్యొచ్చు, ఎందుకంటే కలిపితే ముక్క చెదిరిపోద్ది..:)
- చివరగా ముక్క బాగా ఉడికింది అనుకోగానే ఒక 100ml కాచినపాలు పోసి కలపండి.పాలుపోస్తే కూర బాగా గుజ్జుగా వస్తుంది,రంగుకూడా వస్తుంది...రంగు బాగా పసుపుగా కావాలంటే ఓ చిటికెడు పసుపు మొదట ముక్కలు తాలింపులో వెయ్యగానే వేసుకోవాలి.....ఇప్పుడు రుచికి కాస్త అల్లం,వెల్లుల్లి తొక్కి వేసుకోవాలి,కాసిన్ని కొతిమీరాకులు కూడా....:)
- అవి వేశాక ఒక నిమిషం పొయ్యి మీద ఉంచి దించెయ్యండి...అంతే ఘుమఘుమలాడె దోసకాయ ఇగురు తయారు....చాలా వీజీగా ఉంది కదా....
ఇక మిరియాల చారెలా పెట్టాలో గబగబా నేర్చేసుకుందాం...ఇది అరవోళ్ళ రసం అవునో కాదో నాకు మాత్రం తెలీదు..మా ఇళ్ళల్లో మాత్రం దీన్ని మిరియాలచారనే అంటాం..:)....కొన్ని చోట్ల మరుగుచారని కూడా అంటారు.....బాగా అలిసిపోయి బడలికగా ఉన్నప్పుడు, జొరమొచ్చి నోరు చవి చెడిఉన్నప్పుడూ,కొంచెం ఆజీర్తిగా ఉన్నప్పుడూ ఘాటుగా ఈ చారు కనక పెట్టుకు తింటే భలే హాయిగా ఉంటది....చెయ్యటం చాలా వీజీ...:)
- ముందర కాసిన్ని మిరియాలూ,ధనియాలూ తీసుకోవాలి...మిరియాలు ఎక్కువగా ఉంటే బాగుంటుంది ఘాటుగా.....నాలుగు మెంతులూ,కాస్త జీలకఱ్ఱా కూడా తీసుకోవాలి....కొంతమంది కంది పప్పు కూడా వేస్తారు.....ఇవన్నీ తీసుకుని బాండీలో వేసి పొయ్యిమీద పెట్టి రెండు నిమిషాలు వేయించాలి....అవి వేగగానే తీసి అన్నీ కలిపి రోట్లో పొడికొట్టుకోవాలి..మిక్సీలో వేస్తే అంత రుచి రాదు..ఉన్న సువాసనకాస్తా పోతుంది..రోలు లేకపోయినా మసాలా నూరుకునే గిన్నె ఉంటదికదా దాంటొ అయినా మెత్తగా నూరుకోవాలి.....
- ఇప్పుడు ఒక లీటరు నీళ్ళు తీసుకుని దాంట్లో ఒక చిన్నముద్ద చింతపండు వెయ్యాలి...కావాలనుకుంటే రెండు టమాటాలు సన్నగా ముక్కలుకోసి వేసుకోవచ్చు...ఇప్పుడు పైన నూరిపెట్టుకున్న మిరియాలపొడి దీంటొ వేసి పొయ్యి మీద పెట్టి బాగా మరిగించండి....లీటరు సగం అయ్యేవరకు మరిగించొచ్చు...కొంతమంది చిక్కగా రావాలంటే పప్పు కలపాలేమో అనుకుంటారు..అవసరమే లేదు...ఎంత బాగా మరిగిస్తే అంత చిక్కగా వస్తుంది...
- దించబోయే రెండు నిమిషాల ముందు అల్లం, వెల్లుల్లి తొక్కి వెయ్యాలి,మరికాస్త కొత్తిమీర,సరిపడా ఉప్పు కూడా వేసి మరగనివ్వాలి.....ఇక దించబోయే ముందు రెండు యాలక్కాయలు కొట్టి వెయ్యండి...వాసన అదిరిపోద్ది....పక్క ఇళ్ళవాళ్ళు కూడా ముక్కులు ఎగబీల్చేసుకుంటారు...:)
- తర్వాత దీంటోకి మామూలుగా పెట్టుకునే తాలింపు తిప్పి వెయ్యడమే....ఆయితే తాలింపులో మరికాస్త కరివేపాకు,జీలకఱ్ఱ్ర వేస్తే అదిరిపోతుంది...
మిరియాలచారు బాగా కుదిరిందనడానికి నిదర్శనం ఏంటంటే, కంచంలో అన్నంపెట్టుని దాంట్లో చారుపోసి అలా కలపగానే అన్నం మెత్తగా అయిపోయి చారు చిక్కగా అయిపోతుంది..:)....బాగా పిసికి తింటే అద్భుతంగా ఉంటది....ఇలా చేసుకున్న మిరియాలచారు అన్నంతినబోయే ముందు ఒక చిన్న కప్పుడు తాగితే చాలు ఆకలి బాగా పెరుగుతుంది.....మాంఛి ఎపటైజర్ అన్నమాట...:)
హమ్మో! ఇవ్వాళ రెండు కూరలు చెప్పేశా.....మళ్ళా మరో మంచికూర చెయ్యగానే చెప్తానేం...ప్రస్తుతానికి టాటా,బైబై......:)
సొరకాయ పాయసం - ఇదో "శాకపాయసం"
"నేస్తం గారూ! ఈ టపా మీకోసమే ప్రత్యేకంగా...:)"
"ఏంటీ! ఈ పిల్లగాడు "నేస్తం"కి మాత్రమే చెప్తాడా ఏంటి?" అనుకుంటున్నారా! అబ్బే! అదేంలేదు..అందరికోసమూ...కాని నేస్తంగారికి ఇంకొంచెం ఎక్కువ ప్రత్యేకంగా అన్నమాట....ఎందుకంటారా...అది తెలియాలంటే బోలెడు రీళ్ళు వెనక్కు తిప్పేసుకోవాలన్నమాట!
"అనగనగా, ఒకానొక తెలుగుబ్లాగుదేశంలో ఆడవాళ్ళు మాత్రమే వంటల గురించి రాయగలరని,వాళ్ళకి తెలిసినవే వంటలని వాళ్ళు ఫీలవుతున్న రోజులు..అప్పుడు ,ఆ స్త్రీజాత్యహంకారధోరణికి గొడ్డలిపెట్టుగా మా బెమ్మీల తరపునుంచి మా నాగా "మీరేం చేస్తారు? మేం రైస్ కుక్కర్లో చపాతీలు కూడా బహువీజీగా చేసెయ్యగలం" అని చేసి చూపించాడు..బెమ్మీనా మజాకా!.;)..అప్పుడు అది చూసి తెగ కుళ్ళేసుకున్న ఈ ఆడలేడీసు పాపం మా నాగ మీద పొలోమని దండెత్తేశారన్నమాట! సమయానికి మంచుగారు కూడా అందుబాటులో లేరు..సో, నేనొక్కణ్ణే నా రైసుకుక్కర్ వంటల్ని అమ్ములపొదిలో పెట్టేసుకుని మా నాగాకి సపోర్టుగా కామెంట్ల యుద్ధంలోకి దిగేశాను....
నా ఒక్కో అస్త్రం సంధిస్తుంటే, అప్పుడు నేస్తం గారు యుద్ధభూమిలోకి ఎంటర్ అయిపోయి నా "సొరకాయ పాయసం" అనే అస్త్రాన్ని,లేడీసుకి సహజమైన వంటాహంకారంతో(దీంటో కాస్తంత గోదారి అభిజాత్యం కూడా ఉందనుకోండి..:)...) అదసలు అస్త్రమే(వంటకమే) కాదు అని తేల్చేశారు....దాంతో తీవ్రంగా హర్టయిన నేను ఆ స్త్రీజాత్యహంకారధోరణికి నిరసనగా కొత్త బ్లాగు మొదలెట్టేశానన్నమాట!"
అదీ "పాకవేదం" పుట్టుక వెనక ఉన్న అసలు హిస్టరీ....తర్వాత విషయాలు మీకు తెలిసినవే...:)
నేస్తం గారూ! ఉన్నారా! ఉంటే, "సొరకాయ తో పాయసం కూడా చేస్తారా.." అన్నారుగా..ఎలా చెయ్యాలో ఇవ్వాళ చెప్పేస్తున్నా...మీరు ప్రయత్నించి ఎలా ఉందో చెప్పాలన్నమాట..:)...
అసలు పాయసం అంటే ఏంటి? "పయః" అంటే పాలు అని అర్థం... ఆ పాలతో వండిన పదార్థం కాబట్టి "పాయసం" అయింది....దీన్ని రకరకాలుగా పిలుస్తార్లే...పాయసం,క్షీరాన్నం,పరమాన్నం,పరవాణ్ణం..ఇలా బోల్డు రకాలుగా పిలుస్తార్లే....మా ఊళ్ళల్లో ఐతే "పాసెం","సిరాన్నం" అంటారు.....నాకీ "పాసెం" అంటే అర్థమయ్యేదికాని, ఈ "సిరాన్నమే" బొత్తిగా అర్థమయ్యేది కాదు,అమ్మమ్మ అంటుండేదలా....."సిరాపోసి వండుతారా ఏంటి ఖర్మ!" అనుకున్నే వాణ్ణి....కాని ఆలోచిస్తే టక్కున లైటు వెలిగిందోసారి..."ఓహో! ఇది క్షీరాన్నానికి వికృతన్నమాట" అని....అబ్బ! చూడండి నాకు ఎంత తెలివో! పక్కన ఎవరూ లేకపోటంతో, నా తెలివికి సెబాస్ అని నేనే జబ్బ చరిచేసుకున్నానన్నమాట!....:)..
ఇక ఆ పాయసాన్ని కూరగాయలేసి వండితే దాన్నే" శాకపాయసం " అంటారు....ఇది నాన్నగారు కనిపెట్టిన పదంలెండి....మనకి నో క్రెడిట్స్.:)...అమ్మ రకరకాల శాకపాయసాలు వండేది....వంకాయ పాయసం,బీరకాయ పాయసం, ములక్కాడల పాయసం,బూడిదగుమ్మడి పాయసం, అరటికాయ పాయసం, చివరికి "ఉల్లిపాయసం" కూడా...:)...ఎన్ని రకాలుగా వండినా సూపర్గా ఉండేది, మా ఊళ్ళల్లో పిచ్చ ఫేమస్ "సొరకాయ పాయసమే".....మిగతా వాటికి అంత రుచి రాదు...
సంక్రాంతి నెలలో తెగ కాస్తాయేమో సొరకాయలు, మా ఊళ్ళో రోజుకొకళ్ళేనా వండుకుంటారు.....మా ఇంట్లో ఇప్పటికీ విరక్కాస్తాయి సొరపాదులు...బజారంతా పంచుతుంది అమ్మ, కాయలు..ఇక ఆ సీజన్లో మా ఇంట్లో ఒకటే సొరకాయ వంటకాలు..... పాలేసి కూర,వేపుడు,పులుసు, రోటి పచ్చడి...ఆఖరికి ఓ జాడీడు ఊర పచ్చడి కూడా పెట్టేస్తుంది అమ్మ.......ఇక పాయసమైతే కనీసం వారానికోసారన్నా వండాల్సిందే, పేద్ద తపేళాకి.....ఇక ఆ రోజు అన్నంలేదు....కూరలు కూడా దాంటో కలుపుకు తినడమే.....పేద్ద గురుగు చేసి, దాన్నిండా నెయ్యి పోసుకుని, పక్కన సాధుమసాలా దట్టించిన వంకాయ కూర, రోటి పచ్చడి వేసుకుని నంజుకుంటూ తింటుంటే ఉంటదీ..అబ్బబ్బా....స్వర్గానికి బెత్తెడెత్తున కాదు, దాటి పైపైనే.......:)...
ఇక కొంతమంది మామూలుగా బియ్యంతో వండే పొంగలన్నంలో కాస్త సొరకాయ తురుము వేసి అదే సొరకాయ పాయసం అని ఫీల్ అయిపోతుంటారు,దాన్ని మళ్ళా హిందీలో "కద్దూ కా ఖీర్"అని పిల్చేసి తెగ పోషు ఫీలింగూ...మా క్లాసుమేటు ఒకమ్మాయి అలా చేసి తెగ గొప్ప ఫీల్ అయ్యేది...కాని తర్వాత నా "సొరకాయ పాయసం"తిన్నాక తను వండటమే మానేసింది, (మా ఫ్రెండ్సు చావగొట్టేశారు మరి..:)..).....బై డెఫినిషన్ కరెక్టవ్వొచ్చేమోగాని, రుచివార చూస్తే దానికీ, మా ఇళ్ళల్లో చేసుకునేదానికీ చాంతాడంత డిఫరెన్సు......అసలు ఆ విధానమే వేరు...మరి అది ఎల్లాగో చూద్దామా.....
ఇక ఇలా వండిన పాయసం వేడిగా తిన్నా బాగుంటుంది, బాగా చల్లారాక సాయంత్రం తింటే ఇంకా బాగుంటుంది.....కాని తినేప్పుడు పెద్ద గురుగు చేసుకుని, దాన్నిండా కమ్మటి నెయ్యి పోసుకుని, పక్కన వంకాయకూర, రోటి పచ్చడి పెట్టుకుని నంజుకుంటూ తింటం మాత్రం మర్చిపోవద్దేం........
"అనగనగా, ఒకానొక తెలుగుబ్లాగుదేశంలో ఆడవాళ్ళు మాత్రమే వంటల గురించి రాయగలరని,వాళ్ళకి తెలిసినవే వంటలని వాళ్ళు ఫీలవుతున్న రోజులు..అప్పుడు ,ఆ స్త్రీజాత్యహంకారధోరణికి గొడ్డలిపెట్టుగా మా బెమ్మీల తరపునుంచి మా నాగా "మీరేం చేస్తారు? మేం రైస్ కుక్కర్లో చపాతీలు కూడా బహువీజీగా చేసెయ్యగలం" అని చేసి చూపించాడు..బెమ్మీనా మజాకా!.;)..అప్పుడు అది చూసి తెగ కుళ్ళేసుకున్న ఈ ఆడలేడీసు పాపం మా నాగ మీద పొలోమని దండెత్తేశారన్నమాట! సమయానికి మంచుగారు కూడా అందుబాటులో లేరు..సో, నేనొక్కణ్ణే నా రైసుకుక్కర్ వంటల్ని అమ్ములపొదిలో పెట్టేసుకుని మా నాగాకి సపోర్టుగా కామెంట్ల యుద్ధంలోకి దిగేశాను....
నా ఒక్కో అస్త్రం సంధిస్తుంటే, అప్పుడు నేస్తం గారు యుద్ధభూమిలోకి ఎంటర్ అయిపోయి నా "సొరకాయ పాయసం" అనే అస్త్రాన్ని,లేడీసుకి సహజమైన వంటాహంకారంతో(దీంటో కాస్తంత గోదారి అభిజాత్యం కూడా ఉందనుకోండి..:)...) అదసలు అస్త్రమే(వంటకమే) కాదు అని తేల్చేశారు....దాంతో తీవ్రంగా హర్టయిన నేను ఆ స్త్రీజాత్యహంకారధోరణికి నిరసనగా కొత్త బ్లాగు మొదలెట్టేశానన్నమాట!"
అదీ "పాకవేదం" పుట్టుక వెనక ఉన్న అసలు హిస్టరీ....తర్వాత విషయాలు మీకు తెలిసినవే...:)
నేస్తం గారూ! ఉన్నారా! ఉంటే, "సొరకాయ తో పాయసం కూడా చేస్తారా.." అన్నారుగా..ఎలా చెయ్యాలో ఇవ్వాళ చెప్పేస్తున్నా...మీరు ప్రయత్నించి ఎలా ఉందో చెప్పాలన్నమాట..:)...
అసలు పాయసం అంటే ఏంటి? "పయః" అంటే పాలు అని అర్థం... ఆ పాలతో వండిన పదార్థం కాబట్టి "పాయసం" అయింది....దీన్ని రకరకాలుగా పిలుస్తార్లే...పాయసం,క్షీరాన్నం,పరమాన్నం,పరవాణ్ణం..ఇలా బోల్డు రకాలుగా పిలుస్తార్లే....మా ఊళ్ళల్లో ఐతే "పాసెం","సిరాన్నం" అంటారు.....నాకీ "పాసెం" అంటే అర్థమయ్యేదికాని, ఈ "సిరాన్నమే" బొత్తిగా అర్థమయ్యేది కాదు,అమ్మమ్మ అంటుండేదలా....."సిరాపోసి వండుతారా ఏంటి ఖర్మ!" అనుకున్నే వాణ్ణి....కాని ఆలోచిస్తే టక్కున లైటు వెలిగిందోసారి..."ఓహో! ఇది క్షీరాన్నానికి వికృతన్నమాట" అని....అబ్బ! చూడండి నాకు ఎంత తెలివో! పక్కన ఎవరూ లేకపోటంతో, నా తెలివికి సెబాస్ అని నేనే జబ్బ చరిచేసుకున్నానన్నమాట!....:)..
ఇక ఆ పాయసాన్ని కూరగాయలేసి వండితే దాన్నే" శాకపాయసం " అంటారు....ఇది నాన్నగారు కనిపెట్టిన పదంలెండి....మనకి నో క్రెడిట్స్.:)...అమ్మ రకరకాల శాకపాయసాలు వండేది....వంకాయ పాయసం,బీరకాయ పాయసం, ములక్కాడల పాయసం,బూడిదగుమ్మడి పాయసం, అరటికాయ పాయసం, చివరికి "ఉల్లిపాయసం" కూడా...:)...ఎన్ని రకాలుగా వండినా సూపర్గా ఉండేది, మా ఊళ్ళల్లో పిచ్చ ఫేమస్ "సొరకాయ పాయసమే".....మిగతా వాటికి అంత రుచి రాదు...
సంక్రాంతి నెలలో తెగ కాస్తాయేమో సొరకాయలు, మా ఊళ్ళో రోజుకొకళ్ళేనా వండుకుంటారు.....మా ఇంట్లో ఇప్పటికీ విరక్కాస్తాయి సొరపాదులు...బజారంతా పంచుతుంది అమ్మ, కాయలు..ఇక ఆ సీజన్లో మా ఇంట్లో ఒకటే సొరకాయ వంటకాలు..... పాలేసి కూర,వేపుడు,పులుసు, రోటి పచ్చడి...ఆఖరికి ఓ జాడీడు ఊర పచ్చడి కూడా పెట్టేస్తుంది అమ్మ.......ఇక పాయసమైతే కనీసం వారానికోసారన్నా వండాల్సిందే, పేద్ద తపేళాకి.....ఇక ఆ రోజు అన్నంలేదు....కూరలు కూడా దాంటో కలుపుకు తినడమే.....పేద్ద గురుగు చేసి, దాన్నిండా నెయ్యి పోసుకుని, పక్కన సాధుమసాలా దట్టించిన వంకాయ కూర, రోటి పచ్చడి వేసుకుని నంజుకుంటూ తింటుంటే ఉంటదీ..అబ్బబ్బా....స్వర్గానికి బెత్తెడెత్తున కాదు, దాటి పైపైనే.......:)...
ఇక కొంతమంది మామూలుగా బియ్యంతో వండే పొంగలన్నంలో కాస్త సొరకాయ తురుము వేసి అదే సొరకాయ పాయసం అని ఫీల్ అయిపోతుంటారు,దాన్ని మళ్ళా హిందీలో "కద్దూ కా ఖీర్"అని పిల్చేసి తెగ పోషు ఫీలింగూ...మా క్లాసుమేటు ఒకమ్మాయి అలా చేసి తెగ గొప్ప ఫీల్ అయ్యేది...కాని తర్వాత నా "సొరకాయ పాయసం"తిన్నాక తను వండటమే మానేసింది, (మా ఫ్రెండ్సు చావగొట్టేశారు మరి..:)..).....బై డెఫినిషన్ కరెక్టవ్వొచ్చేమోగాని, రుచివార చూస్తే దానికీ, మా ఇళ్ళల్లో చేసుకునేదానికీ చాంతాడంత డిఫరెన్సు......అసలు ఆ విధానమే వేరు...మరి అది ఎల్లాగో చూద్దామా.....
- ముందు ఒక మంచి సొరకాయ తీసుకోవాలి.మంచి అంటే ఎలా అనుకుంటున్నారా! ఏం లేదండి...మరీ లేతగా కాకుండా బాగా కండ పట్టి ఉండాలి...అలా అని మరీ ముదరకూడదు....దీన్ని శుభ్రంగా కడిగి చెక్కు తీసి,విత్తనాలు కూడా తీసేసి, కండవరకు మోయనమైన సైజులో ముక్కలు కొయ్యండి....తురుముగా చెయ్యొద్దు..ముక్కగా తగుల్తుంటేనే రుచి....
- ఇప్పుడు కొంచెం లోతుగా,వెడల్పుగా ఉండే మందపాటి గిన్నె తీసుకుని,దాంట్లో పైన కోసిపెట్టుకున్న ముక్కల్ని వేసి, సరిపడా ఉప్పు,నీళ్ళు వేసి పొయ్యిమీద పెట్టి ఉడికించండి....
- తర్వాత కావల్సిన ముఖ్యమైన పదార్థం బియ్యప్పిండి....తాజాగా అప్పటికప్పుడు తయారు చేసుకున్న పిండి అయితేనే బాగుంటుంది...పాయసం చెయ్యాలనుకుంటే పొద్దున్నే బియ్యంనానబోసి, ఓ రెండు గంటలు నాననివ్వాలి...రాత్రి నానబెడితే మరీ మంచిది...తర్వాత ఆ బియ్యాన్ని కడిగి వడెయ్యాలి..నీళ్ళన్నీ వడిచాక పిండి కొట్టుకోవాలి..రోట్లో కొడితే చాలా బాగా వచ్చిద్ది..కుదరకపోతే మిక్సీ పట్టుకోవచ్చు...{తడిపిండి మాత్రమే వాడాలి..పొడిపిండి పనికిరాదు}
- మీడియం సైజులో ఉండే కాయకి, ఒక సోలెడు పిండి(సుమారుగా అరకేజీ బియ్యం), ఒక అరకేజీ బెల్లం పడతాయి.....కావాలంటే తక్కువ కూడా వేసుకోవచ్చు...అప్పుడు ముక్కలు ఎక్కువ తగుల్తాయి....
- బెల్లాన్ని ఓపిక ఉంటే తురుముకోవచ్చు.లేకపోతే చిన్న చిన్న ముక్కలుగా నలగ్గొట్టి బియ్యప్పిండిలో వేసి నీళ్ళుపోసి బాగా జారుగా కలుపుకోవాలి.....బాగా నీళ్ళు,నీళ్ళుగా(గరిటజారుకంటే ఇంకొంచెం పల్చగా) కలుపుకోవాలి...ఉండలు కట్టకుండా చూసుకోవాలి.....ఈ మిశ్రమంలోనే ఎండుకొబ్బరి తురుము ఒక కప్పుడు వేసి కలిపెయ్యాలి....
- ఇప్పుడు ఈ మిశ్రమాన్ని పైన ముక్కలు ఉడికాయనుకోగానే వాటిలో పోసి మెల్లగా తిప్పుతూ ఉండాలి...పోసేప్పుడు ఒక్కసారిగా గుమ్మరించొద్దు...మెల్లగా పోస్తూ, గరిటతో తిప్పుతూ ఉండాలి.లేకపోతే ఉండలు కడుతుంది....పిండి బాగా ఉడికి దగ్గరకి అయ్యేవరకు మెల్లగా తిప్పుతూనే ఉండాలి..మరీ స్పీడుగా తిప్పొద్దు,ముక్క చెదిరిపోతుంది....ఉండకట్టకుండా చూసుకుంటే చాలు....
- పిండి బాగా ఉడికింది, దగ్గరకి అయిందనగానే పాలు పొయ్యాలి...సుమారు అరలీటరు పొయ్యాలి..ఎక్కువ పోసినా రుచొస్తుంది.....పాలు పోసి సన్నసెగ మీద ఉడికించాలి. బాగా దగ్గరకి అవ్వగానే నెయ్యి,యాలకులపొడి,పచ్చకర్పూరం వేసి దించెయ్యాలి...డ్రై ఫ్రూట్స్ కావాలంటే వేసుకోవచ్చు.....నేను వెయ్యను..ఎందుకో నాకు నచ్చదు...:)
- పైన చెప్పిన విధానం మా ఇంట్లో వండేది...మా అమ్మవాళ్ళ నాయనమ్మ అలా కాకుండా, ముక్కలు,పిండి,పాలు,బెల్లం అన్నీ నీళ్ళుపోసి కలిపేసి పొయ్యి మీద (కుక్కర్లో కూడా పెట్టుకోవచ్చేమో!)పెట్టి తిప్పుతూ ఉడికించేదట! నేనెప్పుడూ అలా ప్రయత్నించలా....కావాలంటే మీరు ట్రై చెయ్యండి..:)....నాకు మట్టుక్కు పైలాగానే ఇష్టం...
ఇక ఇలా వండిన పాయసం వేడిగా తిన్నా బాగుంటుంది, బాగా చల్లారాక సాయంత్రం తింటే ఇంకా బాగుంటుంది.....కాని తినేప్పుడు పెద్ద గురుగు చేసుకుని, దాన్నిండా కమ్మటి నెయ్యి పోసుకుని, పక్కన వంకాయకూర, రోటి పచ్చడి పెట్టుకుని నంజుకుంటూ తింటం మాత్రం మర్చిపోవద్దేం........
కోరి భుజింతును, 'కొత్తిమీర పచ్చడి'
టైటిల్ చూడగానే అర్థమైపోయుండాలి మీకు, మనకి కొత్తిమీర పచ్చడంటే ఎంతిష్టమో!...:)....ఇది అందరూ దోశల్లోకో, అన్నంలోకో అప్పటికప్పుడు చేసుకున్నే బండపచ్చడి కాదండోయ్! చక్కటి "కుండపచ్చడి ", అదేనండీ ఊరగాయ..ఊరుగాయ..మీ ఇళ్ళల్లో ఎలా పిలుచుకుంటే అది.....
అసలు నాకు మట్టుక్కు నాకనిపించేదేంటంటే, ఎవరికన్నా "వంట చెయ్యటం బాగా వచ్చు" అన్న సర్టిఫికెట్టు ఇవ్వాలంటే వాళ్ళు అద్భుతంగా ఊరగాయలు పెట్టగలగాలి, అదీ రకరకాలుగా.....{మా అమ్మగారైతే పచ్చళ్ళ సీజనొస్తే ఓ ఇరవై, ముప్ఫై రకాలు పెట్టేస్తారు.(అలా అని పెద్ద వంటొచ్చని కాదులెండి, అన్నీ ఆమ్మ దగ్గరకెళ్ళి పెట్టుకొస్తుంది...:)...).....}ఊరికే పెట్టటం కాదండీ, పెట్టిన పచ్చడి సంవత్సరం తిరిగొచ్చినా పాడవకూడదు, రుచి అస్సలు మాఱకూడదు....
ఇదంతా ఎందుకు చెప్తున్నానంటే మా పెద్దమ్మ పచ్చళ్ళు అద్భుతంగా పెడుతుంది..ఇప్పటికీ మా పది ఫ్యామిలీలకీ పెద్దమ్మే ఆవకాయ,మాగాయ పెడుతుంది...అంత పచ్చడీ ఒక్కతే పెడుతుంది.....ఆవాలు పదికొట్లు తిఱిగి మరీ సెలెక్ట్ చేస్తుంది....కనీసం ముక్కలు కొయ్యడానిక్కూడా ఎవర్నీ గదిలోకి రానివ్వదు......అయితే పోయినేడు నేనేదో అన్నానని మా అక్కలందరికీ ఆవేశమొచ్చి," ఆ పాటి ఆవకాయ మేం పెట్టలేమా" అని అందరూ కలిసి పెట్టారు....చూస్తే పది రోజులకే ముక్క మెత్తబడింది, పచ్చడి రంగుమారింది......:)....అదన్నమాట సంగతి.
ఇక మనం వెరైటీ ప్రియులం కదా! మామూలు ఆవకాయ,మాగాయలు; కొరివికారం,టమాటా పచ్చళ్ళు ఎంతగా ఇష్టమున్నా....బాగా ఇష్టమైనవి కొత్తిమీర పచ్చడి, పులిహోర గోంగూర, సొరకాయ ఊరగాయ, వంకాయ ఊరగాయ......మొదటి రెండూ అద్భుతమైన రుచి..వాటి దుంపతెగ ఎంత బాగుంటాయో వేడివేడన్నంలో కలుపుకుతింటే....నెయ్యికూడా అవసరంలేదు.......
మొన్న నాన్నొచ్చేప్పుడు తిందామనిపించి అమ్మని అడిగా," అమ్మా! తేనెతొనల్తో పాటు కొత్తిమీర పచ్చడి కాస్త పెట్టి పంపు" అని....
అమ్మ"నావల్లకాదు ఫో! ఈ యేడు పొలంలో కొత్తిమీర వెయ్యలా...ఇంటి ముందు వేసిన నాలుగాకులూ తుంచితే మాకు కూరల్లోకి చాలవు..నాకు కొని పెట్టాలంటే ప్రాణమొప్పదు....అయినా ఆ పచ్చడి పెట్టానంటే నాన్న నాలుగురోజుల్లో ఖాళీ చేస్తారు.(నాన్నకి బీపీ ఉందిలెండి)...." అంది...
నాకావేశమొచ్చి," నువ్వు పంపకపోతే నే పెట్టుకోలేనా! నేనే పెట్టుకుంటా ఒక కట్ట కొత్తిమీర కొనుక్కొచ్చుకుని" అన్నా....
అమ్మ,"ఎలా పెట్టాలో నేను చెప్పనుగా! ఎలా పెడతావ్..." అని ఉడికించింది.....
మనమేమన్నా తక్కువతిన్నామా, తగ్గే ప్రశ్నేలేదుగా..." అయినా ఆ పచ్చడేంటో నువ్వే కనిపెట్టినట్టు బడాయి..ఆమ్మ దగ్గర నేర్చుకుందేగా....నేను ఆమ్మతోనే చెప్పించుకుంటా..." అని, వెంటనే ఆమ్మకి ఫోను కొట్టి అడిగా...ఆమ్మ ఓపిగ్గా అంతా చెప్పింది...కాని కొలతలన్నీ గిద్ద, అరసోల, శేరు లెక్కల్లో చెప్పింది.....:(
" ఆమ్మా! నా దగ్గర గిద్దలు,అరసోలలు లేవే!" అంటే," చిన్నబ్బాయ్! నాకు ఆ గ్రాముల లెక్కలు తెలీవబ్బాయ్" అంది.....సర్లే నా తిప్పలేవో నే పడతాలే అని ఫోను పెట్టేసి సరంజామా అంతా కూర్చుకుని పచ్చడి పెట్టేశా,మా పక్కింటోళ్ళ చిన్న రోలు అరువుకు తెచ్చుకు మరీ.....:)..అద్భుతంగా వచ్చిందిలెండి....ఇవ్వాళ కాస్త డ్రైగా అనిపిస్తే కాస్త ఇంగువనూనె కాచిపోసి మరీ పుటో తీసిపెట్టా ఇక్కడ...:).....
మరి మా పెద్దమ్మ చెప్పిన విధానం మీకూ చెప్పనా....
- ఇవ్వాళ మొదట కొలతలు చెప్పేస్తా,ఎందుకంటే పచ్చళ్ళు నిలవుండాలంటే కొలతలే బహు ఇంపార్టెంటు కదా మరి!...ఒక పెద్ద కట్ట కొత్తిమీర, ఓ వంద గ్రాములు చింతపండు, గిద్దెడు ఉప్పు, గిద్దెడు కారం... ;)...సారీ వందగ్రాములకన్నా కాస్త ఎక్కువ.....:).. , ఓ రెండుస్పూనులు ఆవపిండి,రెండు స్పూనులు మెంతి పిండి, సరిపడా నూనె, తిరగమాత సామాన్లు.....ఇవండీ! రెడీ చేసుకున్నారా! ఇక మొదలెట్టేద్దాం..భలే సింపులులే....:)
- కొతిమీర బాగా ఆకు పెద్దగా ఉన్న కట్టలు చూసి తెచ్చుకోండి....బాగా కడిగి వేర్ల భాగం వరికి కోసి పక్కన పడెయ్యండి.....మిగతా కట్టని మోయనమైన సైజులో తరగండి...మరీ చిన్నగా తరగొద్దు..పచ్చడిలో ఆకులుగా తగులుతుంటేనే బాగుంటుంది.....ఆకులు విడిగా పీకొద్దు..అలా కట్ట,కట్ట తరిగెయ్యండి...
- ఇప్పుడు పొయ్యిమీద బాండీ పెట్టేసి, కాస్తంత నూనేసి, ఈ తరిగిన కొత్తిమీరని వేయించండి...ఆకు బాగా దగ్గరకయ్యి, ముద్దలా అవ్వగానే దించెయ్యండి.
- ముందు తీసి పెట్టుకున్న చింతపండుని విత్తనాలు, పీచులు ఉంటే ఏరేసి, ఓ గిన్నెలో తీసుకుని, మరికాసిన్ని నీళ్ళుపోసి పొయ్యి మీద పెట్టెయ్యండి......బాగా కుతకుతా ఉడకనివ్వండి.బాగా ఉడికింతర్వాత దించి పులుసు పిసికెయ్యండి.పిప్పి వస్తే తీసి పడెయ్యండి..(బాగా ఉడికేసరికి నాకు పిప్పి అసలు రాలా...:) అలానే వేసి రోట్లో, తొక్కేశా..కలిసిపోయింది...)...ముందు పులుసు పిసికి దాన్నైనా ఉడికించొచ్చు.....
- ఇప్పుడు పైన వేయించిపెట్టుకున్న కొత్తిమీరని రోట్లో వేసి ఈ పులుసుపోసి కలిపి రుబ్బండి....రుబ్బేప్పుడు మధ్యలో పైన రెడీగా పెట్టుకున్న ఉప్పు, కారం పోసి రుబ్బెయ్యటమే...చివర్లో ఆవపిండి, మెంతిపిండి వేసి కాసేపు తిప్పటమే.ఈ రెండూ రుచికోసమన్నమాట...రోళ్ళు లేకపోతే మిక్సీలో అన్నీ వేసి ఒక తిప్పు తిప్పడమే....మరీ లేహ్యంలా వద్దు...కాస్త ఆకులుగా ఉంటేనే తింటానికి బావుంటుంది....
- ఉప్పు కల్లుప్పైతే మంచి రుచొస్తుంది, నిలవుంటుంది కూడా...రోళ్ళు లేకుండా మిక్సీల్లో రుబ్బాలనుకున్నే వాళ్ళు ఈ ఉప్పుని ముందే మెత్తగా మిక్సీ పట్టుకునుంటే మంచిది.....కారం మంచి ఎర్రగా ఉండే పచ్చడికారం సెలక్ట్ చేసుకోండి....మా గుంటూరు కారమైతే బెస్టు...:)
- ఇక ఈ రుబ్బిన దాన్ని తాలింపెట్టుకోటమే.....నూనె మామూలు తాలింపులంత వేస్తే పచ్చడి నిలవుండదు.కాస్త ఎక్కువే వేసుకోవాలి..... పచ్చడికి పట్టేంత నూనె బాండీలో వేసి కాగిందనిపించగానే తాలింపుగింజలేస్కోవాలి,నాలుగు వెల్లుల్లి రెబ్బలు నొక్కి వెయ్యాలి...మరికాస్త ఇంగువ....ఈ తాలింపుని దించి కొంచెం వేడి తగ్గాక పైన రుబ్బి పెట్టుకున్న పచ్చట్లో కలుపుకోవాలి.....
- మరికాస్త ఇంగువేసి పోపెడితే పచ్చడి ఎంత కమ్మటి వాసనొచ్చిద్దో.....
- పచ్చడి బాగా చల్లారాక జాడీలోకో, సీసాలోకో ఎత్తి పెట్టుకోవాలి..గాలి ఎక్కువగా తగలకుండా జాడీకైతే వాసెన కట్టండి,..సీసాకైతే గట్టిగా మూతపెట్టండి...
- అన్నిటికంటే గుర్తుపెట్టుకోవల్సిన ముఖ్యమైన జాగ్రత్త,(ఇది ఏ ఊరగాయకైనా ఇంపార్టెంటే)....తడి అస్సలు తగలనివ్వద్దు....తడి చేతులు, తడిగా ఉన్న సీసాలు తగిలితే రెండ్రోజులు కూడా నిలవుండదు ఈ పచ్చడి....
- ఇలా పెట్టుకున్న పచ్చడి ప్రిజ్ లో పెట్టకపోయినా రెండు,మూణ్ణెల్లు నిలవుంటుంది......
అదండీ! చాలా ఈజీగా ఉందికదా! ఇంకెందుకాలస్యం అర్జెంటుగా పెట్టెయ్యండి....రోజూ రెండో కూర ఏం చెయ్యాలా అని తెగ ఆలోచించాల్సిన పనుండదు....
రుచ్చూశాక నాకు చెప్పటం మర్చిపోకండేఁ............. :)
దీనికి సబ్‌స్క్రయిబ్ చేయి:
పోస్ట్‌లు (Atom)
